4. október 2011 Forsætisráðuneytið

Þingmálaskrá ríkisstjórnarinnar 2011-2012

Samkvæmt 3. mgr. 58. gr. þingskapalaga nr. 55/1991, með síðari breytingum, skal fylgja stefnuræðu forsætisráðherra yfirlit um þau mál sem ríkisstjórnin hyggst leggja fram á þinginu ásamt áætlun um hvenær þeim verður útbýtt. Yfirlit fyrir 140. löggjafarþing fer hér á eftir. Fram kemur hvort ætlunin er að leggja mál fram að hausti eða vori. Flutt kunna að verða fleiri frumvörp en getið er og atvik geta hindrað flutning einstakra frumvarpa. Jafnframt eru taldar upp fyrirhugaðar tillögur til þingsályktana og helstu skýrslur sem ætlunin er að leggja fram. Eins og fram kemur í 3. mgr. 37. gr. l. nr. 55/1991 mun ríkisstjórnin jafnframt við upphaf vetrarþings, að loknu jólahléi, afhenda forseta Alþingis endurskoðaða áætlun um framlagningu stjórnarfrumvarpa á vetrar- og vorþingi.

Forsætisráðuneytið

Frumvarp til upplýsingalaga
Flutt verður á ný frumvarp til upplýsingalaga sem ekki náðist að afgreiða á 139. löggjafarþingi. Frumvarpið verður endurskoðað í ljósi nefndarálits meirihluta allsherjarnefndar og umræðna á Alþingi. (Haust)
Frumvarp til laga um breytingu á stjórnsýslulögum nr. 37/1993.
Með frumvarpinu verða lagðar til breytingar á lögunum sem m.a. lúta að beitingu stjórnsýsluviðurlaga í samræmi við skýrslu og tillögur nefndar um viðurlög við efnahagsbrotum. Frumvarp þessa efnis var áður flutt á 135. löggjafarþingi en hefur síðan verið í skoðun m.a. vegna ábendinga skattyfirvalda um að ákvæði þess gætu torveldað skattframkvæmd. (Haust)
Frumvarp til laga um breytingu á ýmsum lögum vegna fækkunar úrskurðarnefnda (bandormur).
Markmið frumvarpsins er að fækka úrskurðarnefndum í stjórnsýslunni. Starfshópur er nú að störfum sem fer kerfisbundið yfir grundvöll fyrir starfsemi slíkra nefnda og mun hann skila af sér tillögum á næstunni. (Vor)
Skýrsla forsætisráðherra um framkvæmd þingsályktana frá árinu 2010, sbr. 8. mgr. 44. gr. laga, nr. 55/1991, um þingsköp Alþingis, sbr. 23. gr. laga, nr. 84/2011, um breytingu á lögum um þingsköp Alþingis. (Haust)
Skýrsla forsætisráðherra um framkvæmd þingsályktana frá 1. október 2005 til 31. desember 2009. (Haust)
Skýrsla forsætisráðherra um áhrif laga um opinberar eftirlitsreglur og störf ráðgjafarnefndarinnar og önnur tengd atriði, sbr. 8. gr. laga, nr. 27/1997, um opinberar eftirlitsreglur. (Haust)
Skýrsla forsætisráðherra umráðstöfun lands og landsréttinda innan þjóðlendna og tekna af gjöldum fyrir slík réttindi, sbr. 5. mgr. 3. gr. laga, nr. 58/1998, um þjóðlendur og ákvörðun marka eignarlanda, þjóðlendna og afrétta. (Vor)
Skýrsla samhæfingarnefndar um siðferðileg viðmið í stjórnsýslunni, sbr. f-lið 3. mgr. 17. gr. laga, nr. 73/1969, um Stjórnarráð Íslands, sbr. einnig f-lið 3. mgr. 25. gr. laga, nr. 115/2011, um Stjórnarráð Íslands, samþykkt á Alþingi 17. september sl. Nefndin skal skila forsætisráðherra skýrslu sem svo leggur hana fyrir Alþingi. (Vor)

Efnahags- og viðskiptaráðuneytið

Frumvarp til nýrra heildarlaga um jöfnun flutningskostnaðar.
Með frumvarpinu er lagt til að tekið verði upp flutningsjöfnunarkerfi í samræmi við leiðbeiningar ESA um byggðaaðstoð. Í frumvarpinu er gert ráð fyrir að framleiðslufyrirtæki geti sótt um endurgreiðslu í hlutfalli við umframkostnað vegna flutnings á framleiðsluvörum og fjarlægð frá meginmarkaði. Markmiðið með flutningsjöfnunarkerfi er að styðja við framleiðsluiðnað og atvinnuuppbyggingu á svæðum sem búa fjarri meginmarkaði og skerta samkeppnisstöðu vegna hærri flutningskostnaðar. (Haust)
Frumvarp um breytingar á lögum um Hagstofu Íslands.
Með frumvarpinu verður kveðið skýrar á um heimild Hagstofu Íslands til að afla upplýsinga um fjármál heimila og fyrirtækja og afhenda stjórnvöldum gögn að uppfylltum ströngum skilyrðum í skilningi laga um persónuvernd. Markmið með lagabreytingunum er að tryggja að ráðherra efnahagsmála hafi aðgang að upplýsingum sem honum eru nauðsynlegar við stefnumótun og mælingar á árangri aðgerða sem varða heimilin og fyrirtækin í landinu. Þá er jafnframt verið að tryggja að Seðlabanki Íslands hafi aðgang að betri og vandaðri gögnum til að sinna hlutverki sínu við hagstjórn í landinu. (Haust)
Frumvarp til laga um heimild fyrir ríkisstjórnina til hækkunar á kvóta Íslands hjá Alþjóðagjaldeyrissjóðnum og til að staðfesta fyrir Íslands hönd breytingar á stofnskrá sjóðsins.
Með lagafrumvarpi þessu er leitað heimildar fyrir ríkisstjórnina til að samþykkja hækkun á kvóta landsins hjá Alþjóðagjaldeyrissjóðnum (AGS) samkvæmt samþykkt yfirstjórnar sjóðsins í tengslum við fjórtándu endurskoðun á stofnfé sjóðsins. Við fjórtándu almennu kvótahækkunina er miðað við að heildarkvótar sjóðsins tvöfaldist úr um 238,4ma SDR í um 476,8ma SDR (um það bil 750ma USD). Kvóti Íslands hækkar úr 117,6 milljónir SDR í 321,8 milljónir SDR, sem jafngildir um 58,3ma ISK á skráðu miðgengi SDR 23. mars 2011. Hlutdeild Íslands í kvótum Alþjóðagjaldeyrissjóðsins hækkar nokkuð við þessa breytingu eða úr 0,055% í 0,067%. (Haust)
Frumvarp til laga um breyting á lögum um greiðslu kostnaðar vegna opinbers eftirlits með fjármálastarfsemi.
Á hverju hausti er lagt fram frumvarp til laga um breyting á lögum um greiðslu kostnaðar vegna opinbers eftirlits með fjármálastarfsemi. Samkvæmt lögunum er lagður sérstakur skattur, eftirlitsgjald, á þá aðila sem lúta eftirliti Fjármálaeftirlitsins sem stendur að fullu undir kostnaði við rekstur stofnunarinnar. (Haust)
Frumvarp til laga um breytingu á lögum um fjármálafyrirtæki.
Í kjölfar dóms Hæstaréttar Íslands í máli nr. 379/2011, sem kveðinn var upp 7. júlí s.l., hafa ráðuneytinu borist ábendingar um að þörf sé á að tryggja að varnarþing við höfðun riftunarmála vegna fjármálafyrirtækja sem tekin hafa verið til slita með úrskurði íslenskra dómstóla skuli vera hér á landi. Frumvarpinu er ætlað að bregðast við ofangreindum ábendingum og verða því lagðar til breytingar á XII. kafla laganna, í þeim tilgangi að lögleiða sérstakt varnarþingsákvæði sem skuli gilda um fjármálafyrirtæki sem tekin hafa verið til slita hér á landi. (Haust)
Frumvarp til laga um breytingar á lögum um aðgerðir gegn peningaþvætti og fjármögnun hryðjuverka.
Tilgangurinn með frumvarpinu er að tryggja það að Ísland fullnægi skuldbindingum sínum gagnvart FATF (Financial Action Task Force), en landið er núna í náinni eftirfylgni (s.k. „enhanced-follow up“) og þarf að ljúka lagfæringum á því sem út af stendur samkvæmt niðurstöðum FATF. Um örfá atriði er að ræða, en það sem er mikilvægast er að gera breytingar á skilgreiningunni á s.k. raunverulegum eiganda (e. beneficial owner), en að mati FATF þykir skilgreining núgildandi laga heldur þröng. (Haust)
Frumvarp til laga um breytingar á lögum um öryggi greiðslufyrirmæla í greiðslukerfum.
Í mars s.l. var skipuð nefnd til að endurskoða lög nr. 90/1999 um öryggi greiðslufyrirmæla í greiðslukerfum, með það að markmiði að innleiða efni tilskipunar 2009/44/EB frá 6. maí 2009 um breytingar á tilskipun 98/26/EB um endanlegt uppgjör í greiðsluuppgjörskerfum og uppgjörskerfum fyrir verðbréf. Er hlutverk nefndarinnar að skila til ráðherra formlegum tillögum að breytingum á lögum nr. 90/1999. Nefndin hittist fyrst í lok apríl. Fyrstu drög að frumvarpi liggja fyrir og einnig er hafin vinna við greinargerð. (Haust)
Frumvarp til laga um innstæðutryggingar og tryggingakerfi fyrir fjárfesta.
Í frumvarpinu er að finna viðamiklar breytingar á gildandi löggjöf um innstæðutryggingar sem hafa það að markmiði að skýra betur hlutverk Tryggingarsjóðs innstæðueigenda, hækka iðgjaldagreiðslur og auka þar með ábyrgð fjármálafyrirtækja til þess að byggja upp traust innstæðutryggingarkerfi fyrir sparifjáreigendur. Á 138. löggjafarþingi var lagt fram frumvarp til nýrra heildarlaga um innstæðutryggingar. Eftir 2. umræðu vorið 2010 var það sent aftur til viðskiptanefndar og gerðar á því minniháttar breytingar að beiðni nefndarinnar. Var frumvarpið þannig breytt lagt fram á 139. löggjafarþingi. Frumvarpinu var vísað aftur til viðskiptanefndar eftir 2. umræðu s.l. vor, en frumvarpið hlaut ekki afgreiðslu í þeirri mynd sem það var lagt fram. Til þess að unnt væri að innheimta iðgjöld til TIF vegna yfirstandandi árs lagði viðskiptanefnd fram frumvarp til breytinga á gildandi lögum (bráðabirgðaákvæði). (Haust)
Frumvarp til laga um lögmæltar ökutækjatryggingar og skaðabótaábyrgð vegna vélknúinna ökutækja.
Frumvarp til laga sem ætlað er að innleiða tilskipun 2009/103/EB um ökutækjatryggingar var lagt fram á vorþingi. Í tengslum við þetta frumvarp hefur í innanríkisráðuneytinu verið unnið að breytingu á umferðarlögum nr. 50/1987 (ný heildarlög). Viðskiptanefnd afgreiddi frumvarpið frá sér á septemberþinginu en ekki tókst að ljúka þinglegri meðferð þess. Er stefnt að því að leggja það fram að nýju að teknu tilliti til þeirra breytingartillagna sem viðskiptanefnd samþykkti. (Haust)
Frumvarp til laga um breytingar á lögum um verðbréfaviðskipti.
Stefnt er að endurskoðun á ákvæðum laga nr. 108/2007 og hafa ráðuneytinu borist tillögur í þá veru m.a. frá Fjármálaeftirlitinu. Jafnframt er unnið að endurskoðun laganna með hliðsjón af þeim athugasemdum sem gerðar voru í skýrslu Rannsóknarnefndar Alþingis. Ennfremur hefur Eftirlitsstofnun EFTA (ESA) gert nokkrar athugasemdir við innleiðingu tilskipunar 2004/39/EB og tilskipunar 2003/6/EC um verðbréfaviðskipti og tekur endurskoðunin jafnframt mið af þeim. (Haust)
Frumvarp til laga um breytingu á lögum nr. 3/2006, um ársreikninga, með síðari breytingum.
Með frumvarpinu eru lagðar til breytingar vegna innleiðingar á tilskipun 2009/49/EB sem varða samstæðureikningsskil meðalstórra fyrirtækja. Frumvarpið er lagt fram vegna skuldbindinga skv. EES samningnum. (Haust)
Frumvarp til laga um sölu fasteigna, fyrirtækja og skipa.
Með frumvarpinu verður lagt til að lögfest verði ný heildarlög um sölu fasteigna, fyrirtækja og skipa. Frumvarpið byggir á frumvarpi sem lagt var fram á 135. og 138. löggjafarþingi en hlaut ekki afgreiðslu. (Haust)
Frumvarp til laga um breytingu á lögum um hlutafélög og lögum um einkahlutafélög (einföldun samruna og skiptingarreglna o.fl.).
Frumvarpinu er ætlað að innleiða í íslenska löggjöf EES-reglur er lúta að einföldun varðandi skýrslugerð við samruna og skiptingu hlutafélaga og einkahlutafélaga. Frumvarpið var lagt fram á 139. löggjafarþingi og er nú endurflutt með smávægilegum breytingum í samræmi við innkomnar athugasemdir við þinglega meðferð. (Haust)
Frumvarp til laga um breytingu á lögum nr. 45/1997, um vörumerki, með síðari breytingum.
Stefnt er að breytingum á lögum vegna Singapúrsamningsins um vörumerkjarétt frá 2006, norrænnar framkvæmdar (umboðsmannaskyldu) og aukningar á skýrleika einstakra ákvæða í gildandi lögum um vörumerki. Frumvarpið var lagt fram á 139. löggjafarþingi og er nú endurflutt með smávægilegum breytingum í samræmi við innkomnar athugasemdir við þinglega meðferð. (Haust)
Frumvarp til laga um breytingu á innheimtulögum, nr. 95/2008.
Með frumvarpinu eru lagðar til breytingar á innheimtulögum vegna framkvæmdar laganna, yfirleitt að tillögu Fjármálaeftirlitsins, m.a. um vernd fjár á vörslufjárreikningum og Neytendastofu sem eftirlitsaðila á takmörkuðu sviði. Frumvarpið var lagt fram á 139. löggjafarþingi og er nú endurflutt með smávægilegum breytingum í samræmi við innkomnar athugasemdir við þinglega meðferð. (Haust)
Frumvarp til laga um breytingu á lögum nr. 2/1995, um hlutafélög, með síðari breytingum (opinber hlutafélög o.fl.).
Með frumvarpinu eru m.a. lagðar til breytingar á ákvæðum hlutafélagalaga er varða opinber hlutafélög. (Haust)
Frumvarp til breytinga á lögum nr. 34/1991 um fjárfestingu erlendra aðila í atvinnurekstri.
Endurskoðun laganna í samræmi við stefnumótun ríkisstjórnar um beina erlenda fjárfestingu. (Vor)
Frumvarp til laga um breyting á lögum nr. 3/2006, um ársreikninga, með síðari breytingum.
Með frumvarpinu eru lagðar til breytingar sem leiða af heildaryfirferð yfir lög um ársreikninga sem talin er nauðsynleg í kjölfar hrunsins. Í frumvarpinu er m.a. ætlunin að taka á skilum ársreikninga. (Vor)
Frumvarp til laga um breyting á lögum um bókhald, nr. 145/1994, með síðari breytingum.
Frumvarp til laga um breytingar á lögum um bókhald verður lagt fram samhliða frumvarpi til laga um breytingar á lögum um ársreikninga. (Vor)
Frumvarp til laga um almannaheillasamtök.
Með frumvarpinu er lagt til að sett verði heildarlög um almannaheillasamtök. Í frumvarpinu verði slík félög skilgreind sérstaklega til aðgreiningar frá öðrum frjálsum félögum, kveðið verði á um réttindi slíkra félaga og skyldur, t.d. um opið bókhald. (Vor)
Frumvarp til breytinga á lögum nr. 28/2001 um rafrænar undirskriftir.
Með aukinni útbreiðslu rafrænna skilríkja og notkun rafrænna undirskrifta er þörf á að endurskoða lög um rafrænar undirskriftir. (Vor)
Frumvarp til laga um breytingu á lögum nr. 24/2006, um faggildingu o.fl., með síðari breytingum.
Með frumvarpinu eru lögð til ný heildarlög um faggildingu í tengslum við innleiðingu nýrrar EES-reglugerðar um faggildingu og markaðseftirlit. Frumvarpið tengist frumvarpi um markaðssetningu vara á vegum innanríkisráðuneytisins. (Vor)
Frumvarp til breytinga á lögum nr. 48/2003 um neytendakaup.
Með frumvarpinu verður gerð tillaga að ýmsum breytingum á lögunum vegna ábendinga sem borist hafa ráðuneytinu, m.a. er varðar eftirfylgni við álit kærunefndar lausafjár- og þjónustukaupa, skýringu á reglu laganna um 5 ára ábyrgðartíma á galla o.fl. (Vor)
Frumvarp til laga um breytingar á lögum um rafræna eignaskráningu verðbréfa.
Fjármálaeftirlitið hefur með höndum veitingu starfsleyfa til eftirlitsskyldra aðila. Frumvarpið leggur til að sama eigi við um þá sem sækja um starfsleyfi á grundvelli þessara laga. (Vor)
Frumvarp til nýrra laga um neytendalán.
Á vorþingi er fyrirhugað að leggja fram frumvarp til nýrra laga um neytendalán sem innleiðir tilskipun 2008/48/EB sama efnis. Tilskipunin er full harmonization og kveður m.a. á um skyldu til þess að framkvæma mat á lánshæfi áður en neytendalán er veitt og aukna upplýsingaskyldu lánveitanda. Nefnd var skipuð í júlí sl. til þess að undirbúa innleiðingu á efni tilskipunarinnar og mun hún skila frumvarpsdrögum í desember. (Vor)
Frumvarp til laga um rafeyrisfyrirtæki.
Nefnd var skipuð í júlí til þess að undirbúa innleiðingu á efni tilskipunar nr. 2009/110/EB um rafeyrisfyrirtæki og mun hún skila frumvarpsdrögum í desember. Tilskipuninni er ætla að koma í staðinn fyrir og víkka gildissvið tilskipunar nr. 2000/46/EB um stofnun, rekstur og eftirlit með rafeyrisfyrirtækjum. Auk þess felur hún í sér breytingar á tveimur öðrum tilskipunum. (Vor)
Frumvarp til laga um breyting á lögum um brunatryggingar og frumvarp til laga um náttúruhamfaratryggingar.
Tvær nefndir voru að störfum um breytingar á lagaákvæðum um brunatryggingar annars vegar og Viðlagatryggingu Íslands hins vegar. Hvorug þeirra lauk þó störfum. Í ljósi þess að mikilvægi beinna eignaskatta sem fjáröflunar fyrir ríkissjóð hefur tekið breytingum, ákvað fjármálaráðuneytið fyrir nokkrum árum að taka til endurskoðunar fjármögnun og utanumhald landskrár fasteigna, sem Fasteignamat ríkisins annaðist. Síðan hafa orðið frekari breytingar á stofnanalegu utanumhaldi skrárinnar. Af því leiðir að huga þarf að grundvelli vátryggingarfjárhæðar, sem samkvæmt gildandi lögum er brunabótamat. Ennfremur þarf að fara yfir hvort tilefni sé til breytinga á skyldu manna til þess að hafa allar húseignir sínar brunatryggðar. Hvað Viðlagatryggingu Íslands áhrærir hefur staðið til frá samþykkt laga um vátryggingarsamninga (2004) að ráðast í endurskoðun lagaumhverfis náttúruhamfaratrygginga. Nefnd er að störfum og er reiknað með að hún skili ráðherra tillögum sínum um mánaðamótin október/nóvember. (Vor)
Frumvarp til laga um breyting á lögum um verðbréfasjóði, fjárfestingasjóði og fagfjárfestasjóði.
Á vorþingi er fyrirhugað að leggja fram frumvarp til laga um breyting á lögum um verðbréfasjóði, fjárfestingasjóði og fagfjárfestasjóði. Frumvarpið mun innleiða tilskipun 2009/65/EB, svokallaða UCITS IV tilskipun. Tilskipunin uppfærir UCITS III með því að kynna nokkrar meginbreytingar. Þessar meginbreytingar snúa að hvernig verðbréfasjóðir skulu tilkynna fyrirhugaða markaðssetningu til eftirlitsaðila í því landi þar sem markaðssetning er fyrirhuguð, gerð skjals með lykilupplýsingum til fjárfesta, samstarf milli eftirlitsaðila aðildarríkjanna, ný ákvæði varðandi samruna sjóða og móðursjóði (master-feeder structures) og hegðunarreglur fyrir rekstrarfélög verðbréfasjóða. Skipuð verður nefnd til að að innleiða efni tilskipunarinnar og skal nefndin skila ráðherra tillögum sínum eigi síðar en 1. mars 2012. (Vor)
Frumvörp tengd heildarendurskoðun á lögum um fjármálamarkaði og opinbert eftirlit
Eftir umfjöllun Alþingis um skýrsluna um framtíð fjármálamarkaða (sjá nr. 36) verður löggjöf á þessu sviði tekin til heildarendurskoðunar og frumvörp á grunni þeirrar vinnu lögð fyrir Alþingi. (Vor)
Frumvarp til laga um breytingar á lögum um Seðlabanka Íslands.
Með frumvarpinu verða lagðar til lítils háttar breytingar á gildandi löggjöf byggt á mati Seðlabankans á að æskilegt sé að fylla og skýra betur nokkra þætti laganna í ljósi þróunar bankalöggjafar í Evrópu. (Vor)
Frumvarp til laga um breyting á lögum um endurskoðendur, nr. 79/2008, með síðari breytingum.
Frumvarpið er lagt fram í kjölfar skýrslu nefndar um málefni endurskoðenda sem unnin var veturinn 2010-2011. (Vor)
Frumvarp til laga um breytingu á lögum um opinbert eftirlit með fjármálastarfsemi nr. 87/1998.
Í samræmi við viljayfirlýsingu stjórnvalda gagnvart Alþjóðagjaldeyrissjóðnum og ábendingar í skýrslu Kaarlos Jännäris, um reglur og eftirlit með bankastarfsemi, verður Íbúðalánasjóður skilgreindur sem sérhæft lánafyrirtæki. Skilgreina þarf hvaða sérstöku þættir í starfsemi sjóðsins eiga ekki að falla undir lögin. (Vor)
Frumvarp til laga um breytingu á lögum um fjármálafyrirtæki nr. 161/2002.
Starfsemi Íbúðalánasjóðs verði felld undir lögin í samræmi við viljayfirlýsingu stjórnvalda gagnvart Alþjóðagjaldeyrissjóðnum og ábendingar í skýrslu Kaarlos Jännäris.(Vor)
Frumvarp til laga um íbúðalán.
Í frumvarpinu verða skilgreindar kröfur til íbúðalána og íbúðalánveitenda að danskri fyrirmynd. Kveðið verður á um forfjármögnun allra íbúðalána og rétt lántaka til uppgreiðslu lána.(Vor)
Tillaga til þingsályktunar um stefnumörkun varðandi beinar erlendar fjárfestingar.
Unnið er að samningu tillögunnar í samstarfi við iðnaðarráðherra. (Haust)
Skýrsla til Alþingis um framtíð fjármálamarkaða og opinbert eftirlit
Skýrslan, sem efnahags- og viðskiptaráðherra leggur fram til umræðu á Alþingi, felur m.a. í sér sér fræðilega úttekt á heildarmyndinni af fjármálamörkuðum og leikreglunum á þeim, hlutverki fjármálakerfis, alþjóðaskuldbindingum og lagaþróun, fjármálalöggjöf og fjármálastöðugleika í ljósi aðstæðna hér á landi. Jafnframt verður fjallað um tengsl efnahagsstefnu og fjármálalöggjafar opinbert eftirlit með fjármálafyrirtækjum og fjármálastöðugleika og samspil milli eindareftirlits og þjóðhagsvarúðar. (Haust)
Skýrsla til Alþingis um beitingu þjóðhagsvarúðartækja.
Skýrslan verður byggð á samantekt Seðlabanka Íslands og er markmiðið að Alþingi ræði tiltækar leiðir og aðgerðir til að byggja á fyrirkomulag til framtíðar, einnig eftir að gjaldeyrishöftum hefur verið aflétt. (Vor)

Fjármálaráðuneytið

Frumvarp til fjárlaga fyrir árið 2012.
Frumvarp til fjáraukalaga fyrir árið 2011.
Frumvarp til lokafjárlaga fyrir árið 2010.
Frumvarp um ráðstafanir í ríkisfjármálum (bandormur).
Í frumvarpinu verða lagðar til breytingar á lögum um umhverfis- og auðlindaskatta nr. 129/2009. Lagt verður til að lögin verði gerð ótímabundin, kolefnisgjaldið hækkað og gjaldstofninn breikkaður. Þá verða lagðar til hækkanir á olíugjaldi, kílómetragjaldi og almennu og sérstöku bensíngjaldi vegna verðlagsbreytinga. Einnig verða lagðar til breytingar á lögum um tekjuskatt er varða viðbótarlífeyrissparnað þannig að heimildin til frádráttar frá tekjum vegna viðbótarlífeyrissparnaðar verði lækkuð úr 4% í 2%. Loks verði lagðar til breytingar á reglum um auðlegðarskatt, gildistími skattsins verði framlengdur til ársins 2015 og skatturinn lagður á í tveimur þrepum. (Haust)
Frumvarp til laga um launaskatt.
Í frumvarpinu verður lagt til að tekinn verði upp launaskattur sem leggst á fjármálafyrirtæki, vátryggingarstarfsemi og lífeyrissjóði. Skattstofninn verði heildarlaunagreiðslur og skatthlutfallið 10,5%. – (Haust)
Frumvarp um ráðstafanir í ríkisfjármálum, o.fl. (bandormur).
Í frumvarpinu verða lagðar til eftirtaldar breytingar:
- breytingar á lögum nr. 113/1990, um tryggingargjald í samræmi við viljayfirlýsingu ríkisstjórnarinnar í tengslum við kjarasamninga vorið 2011. Einnig verða lagðar til breytingar á lögum nr. 90/2003, um tekjuskatt er varða afdráttarskatt af vöxtum sem einnig eru gerðar til samræmis við sömu viljayfirlýsingu.
- hækkanir á ýmsum gjöldum vegna verðlagsbreytinga. Þessi gjöld eru; gjald í framkvæmdasjóð aldraðra, útvarpsgjald, bifreiðagjald, tóbaksgjald, áfengisgjald og sérstakur skattur á selda raforku.
- að lög nr. 86/2007, um skattlagningu kaupskipaútgerðar verði felld brott. Ekki hefur reynt á þau lög í framkvæmd og eftirlitsstofnun EFTA hefur komist að þeirri niðurstöðu að lögin brjóti gegn EES samningnum.
- að hækkun tekjumarka milli skattþrepa samkvæmt launavísitölu verði 3,5% á tekjuárinu 2012.
- að ekki verði heimilt að skuldajafna barnabótum á móti opinberum gjöldum til ríkissjóðs, opinberum gjöldum til sveitarfélaga og vangreiddum meðlögum til Innheimtustofnunar sveitarfélaga á árinu 2012.
- að lögfest verði lágmarksfjárhæð barnabóta.
- að skil á framtali verði skilyrði ákvörðunar vaxtabóta.
- að steinolía verði lituð og gerð gjaldskyld skv. lögum nr. 87/2004, um olíugjald og kílómetragjald.
- að gildistími bráðabirgðaákvæða sem heimila niðurfellingu stimpilgjalds vegna skilmálabreytinga fasteignaveðskuldabréfa einstaklinga og endurfjármögnun sömu bréfa ásamt nýjum bréfum sem gefin eru út af Íbúðalánasjóði verði framlengdur. Ásamt því að framlengdur verði gildistími sambærilegs ákvæðis sem á við um skilmálabreytingar og endurfjármögnun bílalána einstaklinga.
- ýmsar aðhaldsaðgerðir er tengjast fjárlagafrumvarpi. (Haust)
Frumvarp til laga um frávik frá lögum um skatta og gjöld vegna stuðnings úr sjóði ESB sem fjármagnar aðstoð við umsóknarríki.
Í rammasamningi milli ríkisstjórnar Íslands og framkvæmdastjórnar Evrópusambandsins um reglur um samstarf er varðar fjárhagsaðstoð ESB við Ísland innan ramma stuðningsaðgerða sjóðs er fjármagnar aðstoð við umsóknarríki ESB (IPA) kemur m.a. fram að IPA-aðstoð er ekki ætlað að renna til greiðslu skatta eða annarra gjalda. Af þessum sökum er nauðsynlegt til að leggja til nokkrar breytingar varðandi skattlagningu þeirra verkefna sem fjármögnuð eru með styrkjum úr sjóðnum. (Haust)
Frumvarp til laga um breyting á tollalögum nr. 88/2005.
Um er að ræða frumvarp með ýmsum almennum lagfæringum á tollalögum m.a. vegna álits umboðsmanns Alþingis um tollkvóta. (Haust)
Frumvarp til laga um breyting á lögum um virðisaukaskatt nr. 50/1988.
Í frumvarpinu verður lagt til að 100% endurgreiðsla á virðisaukaskatti vegna byggingar, viðhalds og endurbóta á húsnæði verði framlengd um eitt ár en skv. núgildandi lögum fellur endurgreiðslan niður í 60% um áramót. Þá verður heimild til endurgreiðslu 2/3 hluta virðisaukaskatts vegna hópbifreiða og almenningsvagna framlengd um eitt ár sem og heimild til að fella niður eða endurgreiða að fullu virðisaukaskatts vegna kaupa á vetnisbílum og sérhæfðum varahlutum í þá. Loks verður í frumvarpinu lagt til að undanþágur frá lögunum, vegna sölu listamanna á eigin verkum, verði endurskoðaðar og færðar í sambærilegt horf og gildir í Danmörku. (Haust)
Frumvarp til laga um breytingu á lögum nr. 47/2006 um kjararáð.
Með frumvarpinu verða lagðar til breytingar á ákvörðun um laun og starfskjör forstöðumanna hlutafélaga og annars konar félaga sem eru að meiri hluta í eigu ríkisins. Þá verða skrifstofustjórar í Stjórnarráðinu ekki lengur taldir upp í 1. gr. laganna auk þess sem ráðinu verður heimilað að ráða sér skrifstofustjóra. (Haust)
Frumvarp til laga um breytingu á lögum nr.1/1997, um Lífeyrissjóð starfsmanna ríkisins.
Með frumvarpinu eru lagðar til breytingar á 13. gr. laganna til skýringarauka. (Haust)
Frumvarp til laga um breytingar á lögum nr. 129/1997, um skyldutryggingu lífeyrisréttinda og starfsemi lífeyrissjóða.
Endurskoðuð verða ákvæði 10. gr. laganna er varða samninga og reglur um viðbótartryggingarvernd. Einnig verður mögulega gerð breyting á bráðabirgðaákvæði VI, o.fl. (Vor)
Frumvarp til laga um breytingu á lögum um opinber innkaup nr. 84/2007.
Með frumvarpinu verða lagðar til breytingar á lögunum vegna innleiðingar á tilskipun Evrópusambandsins 2007/66/EB varðandi aukna skilvirkni í meðferð kærumála vegna gerðar opinberra samninga. (Vor)

Iðnaðarráðuneytið

Frumvarp til laga um breytingu á lögum nr. 8/1996, um löggildingu nokkurra starfsheita sérfræðinga í tækni og hönnunargreinum.
Frumvarp þetta var flutt á vorþingi 2011 og er nú endurflutt. Frumvarpið snýr að innleiðingu á tilskipun Evrópusambandsins um viðurkenningu á réttindum og prófskírteinum. (Haust)
Frumvarp til laga um breytingu á lögum nr. 139/2001, um stofnun sameignarfyrirtækis um Orkuveitu Reykjavíkur.
Frumvarpið kveður á um breytingar í kjölfar uppskiptingar á sérleyfisstarfsemi Orkuveitu Reykjavíkur og annarri starfsemi sem fyrirhuguð er um áramót. Er það í samræmi við 14. gr. raforkulaga sem kveður á um aðgreiningu samkeppnis- og sérleyfisþátta í rekstri orkufyrirtækja. (Haust)
Frumvarp til laga um breytingu á lögum nr. 73/2005, um skipan ferðamála.
Með frumvarpinu er lögð til endurskoðun ýmissa þátta laganna sem miða að því að setja skýrari ramma um leyfisveitingar og bæta úr þeim annmörkum sem upp hafa komið við framkvæmd laganna og að auka kröfur til leyfishafa um öryggi, gæði og fagmennsku gagnvart ferðamönnum. Breytingartillögur frumvarpsins snúa m.a. að verkefnum Ferðamálastofu, hlutverki og skipan ferðamálaráðs, kröfum til fyrirtækja vegna öryggismála, eftirliti og úrræðum þegar starfsemi er leyfislaus eða leyfishafi fer út fyrir mörk starfsleyfis. (Haust)
Frumvarp til laga um breytingu á lögum nr. 43/1999, um tímabundnar endurgreiðslur vegna kvikmyndagerðar á Íslandi.
Gildandi lög nr. 43/1999 falla úr gildi um næstu áramót. Unnið er að endurskoðun laganna í samráði við hagsmunaaðila og innan þess ramma sem samkeppnisreglur EES samningsins setja stjórnvöldum. (Haust)
Frumvarp til laga um samþættingu þeirra stofnana iðnaðarráðuneytis sem sinna atvinnuþróun, nýsköpun og byggðamálum.
Iðnaðarráðuneytið í samvinnu við Byggðastofnun, Ferðamálastofu og Nýsköpunarmiðstöð vinnur að tillögugerð um samþættingu á starfsemi þessara stofnana í framhaldi af greiningarvinnu sem unnin var haustið 2010. Miðað er við að frumvarp verði lagt fram á haustþingi þar sem m.a. verði kveðið á um að ein löggjöf gildi um starfsemi þessara stofnana. (Haust)
Frumvarp til laga um breytingu á raforkulögum, nr. 65/2003, og breytingu á lögum nr. 87/2003, um Orkustofnun.
Með frumvarpinu er lögð til breyting á raforkulögum sem felur í sér innleiðingu á s.k. þriðju raforkutilskipun ESB (2009/72/EB). Meðal annars er þar kveðið á um sjálfstæði eftirlitsaðila með raforkumarkaði o.fl. (Vor)
Frumvarp til laga um hitaveitur.
Með frumvarpinu er lagt til að ákvæði um hitaveitur verði sameinuð í ein heildarlög um hitaveitur en nú er fjallað um hitaveitur í orkulögunum frá 1967. Markmið laganna er að setja hitaveitum skýrari starfsramma, skilgreina réttindi og skyldur þeirra betur og gæta að neytendavernd í því sambandi. (Vor)
Frumvarp til laga um breytingu á lögum nr. 57/1998, um rannsóknir og nýtingu á auðlindum í jörðu.
Unnið er að endurskoðun ýmissa þátta laganna er lúta að gildissviði þeirra og samræmi við önnur lög. Jafnframt eru til skoðunar þau ákvæði laganna er varða eignarrétt að auðlindum og m.a. samræmi þeirra við ákvæði vatnalaga. (Vor)
Frumvarp til laga um breytingu á lögum nr. 30/2008, um upprunaábyrgð á raforku sem framleidd er með endurnýjanlegum orkugjöfum o.fl.
Með frumvarpinu er lögð til breyting á lögunum sem felur í sér innleiðingu á tilskipun ESB nr. 2009/28/EB um aukinn hlut endurnýjanlegra orkugjafa. Er þar er m.a. kveðið á um útgáfu upprunavottorða. (Vor)
Frumvarp til laga um breytingu á lögum nr. 42/2009, um visthönnun vöru sem notar orku.
Með frumvarpinu er lögð til breyting á lögunum sem felur í sér innleiðingu á tilskipun ESB nr. 2009/125/EB um visthönnun vöru. Um er að ræða minniháttar breytingar á gildandi lögum. (Vor)
Frumvarp til laga um breytingu á lögum nr. 87/2003, um Orkustofnun.
Frumvarpið kveður á um breytingar á hlutverki Orkusjóðs. Lagt er til að aflað verði heimilda til að Orkusjóður geti tekið á móti tekjum, t.d. vegna sölu á upprunavottorðum raforku og að sjóðurinn geti verið aðili að alþjóðlegum rannsóknarverkefnum. Lagt er til að Orkuráð verði lagt niður en þess í stað komi 3ja manna stjórn fyrir sjóðinn. (Vor)
Frumvarp til laga um breytingu á lögum nr. 86/2003, um Íslenskar orkurannsóknir.
Með frumvarpinu er lagt til að stjórnarmenn Íslenskra orkurannsókna verði þrír í stað fimm. (Vor)
Frumvarp til laga um breytingu á lögum nr. 73/1990, um eignarrétt íslenska ríkisins að auðlindum hafsbotnsins.
Með frumvarpinu er styrkari stoðum skotið undir gjaldtökuákvæði laganna og aðrar breytingar lagðar til sem miða að því að aðlaga lögin núverandi umhverfi en þau hafa að mestu staðið óbreytt frá 1990. (Vor)
Frumvarp til laga um breytingu á iðnaðarlögum nr. 42/1978.
Á vegum nefndar iðnaðarráðherra er unnið að heildarendurskoðun gildandi iðnaðarlaga nr. 42/1978. Gert er ráð fyrir að frumvarpið verði lagt fram á vorþingi. (Vor)
Tillaga til þingsályktunar um verndar- og orkunýtingaráætlun.
Í samræmi við lög nr. 48/2011, um verndar- og orkunýtingaráætlun, fer nú fram 12 vikna opið umsagnarferli um drög að þingsályktun iðnaðarráðherra og umhverfisráðherra um verndun og nýtingu náttúrusvæða með áherslu á vatnsafl og jarðhitasvæði. Með rammaáætlun er mörkuð stefna um það hvaða virkjunarkostir komi til greina og hvaða svæði beri að friða og er markmiðið að ná framtíðarsýn í verndunar- og virkjanamálum og almennri sátt í þjóðfélaginu. (Haust)
Tillaga til þingsályktunar um stefnumörkun varðandi beinar erlendar fjárfestingar.
Unnið er að samningu tillögunnar í samstarfi við efnahags- og viðskiptaráðherra. (Haust)
Skýrsla um raforkumálefni.
Í samræmi við 39. gr. raforkulaga nr. 65/2003, verður skýrsla um raforkumálefni lögð fyrir Alþingi á haustþingi. (Haust)

Innanríkisráðuneytið

Frumvarp til laga um breytingu á barnalögum nr. 76/2003.
Með frumvarpinu eru lagðar til ýmsar breytingar á barnalögum m.a. á reglum um sáttameðferð. Frumvarpið var áður flutt á 139. löggjafarþingi. (Haust)
Frumvarp til laga um breytingu á lögum um íslenskan ríkisborgararétt nr. 100/1952.
Með frumvarpinu verða lagðar til ýmsar breytingar m.a. á skilyrðum hvað varðar fjárhæð sekta. Frumvarpið var áður flutt á 139. löggjafarþingi. (Haust)
Frumvarp til laga um lénamál.
Með frumvarpinu er lagt til að settur verði lagarammi um lén sem hafa beina skírskotun til Íslands eins og td. lénið.is. Frumvarpið var áður flutt á 139. löggjafarþingi. (Haust)
Frumvarp til breytinga á lögreglulögum nr. 90/1996.
Með frumvarpinu eru lagðar til breytingar á skipulagi lögregluembætta o.fl. Frumvarpið var áður flutt á 139. löggjafarþingi. (Haust)
Frumvarp til breytinga á lögum um kirkjugarða, greftrun og líkbrennslu.
Lagðar verða til breytingar á ýmsum ákvæðum laganna er varðar útfarir og þjónustu við útfarir, óvígða reiti í kirkjugörðum, líkhús ofl. Frumvarpið var áður flutt á 136. löggjafarþingi. (Haust)
Frumvarp til laga um breyting á lögum um meðferð sakamála nr. 88/2008.
Með frumvarpinu verða lagðar til breytingar sem fela í sér auknar heimildir til að ljúka málum með lögreglustjórasáttum. (Haust)
Frumvarp til laga um breytingu á lögum um meðferð sakamála nr. 88/2008.
Í frumvarpinu er lagt til að rannsóknarheimildir lögreglu gagnvart brotum sem eru í undirbúningi séu styrktar þegar kemur að starfsemi skipulagðra glæpasamtaka. (Haust)
Frumvarp til breytinga á lögum um meðferð sakamála nr. 88/2008.
Frestun ákvæða laganna er kveða á um embætti héraðssaksóknara. (Haust)
Frumvarp til laga um breyting á almennum hegningarlögum nr. 19/1940.
Með frumvarpinu verða lagðar til breytingar vegna innleiðingar samnings Evrópuráðsins gegn kynferðislegri misneytingu og misnotkun barna. (Haust)
Frumvarp til laga um breyting á almennum hegningarlögum nr. 19/1940.
Með frumvarpinu verða lagðar til breytingar á VII. kafla laganna um öryggisráðstafanir þar sem fjallað er m.a. um úrræði vegna ósakhæfra einstaklinga. Með breytingunum er stefnt að betra samspili einstakra úrræða og skilyrðum fyrir beitingu þeirra. (Haust)
Frumvarp til breytinga á lögum um fjarskipti nr. 81/2003.
Með frumvarpinu eru innleiddar nýjustu tilskipanir ESB á sviði fjarskipta auk þess sem í frumvarpinu er að finna nokkur nýmæli, þ.á m. er varða stofnun öryggis- og viðbragðsteymis á sviði netöryggis (CERT-ÍS). (Haust)
Frumvarp til breytinga á lögum um Póst- og fjarskiptastofnun nr. 69/2003.
Frumvarpið er lagt fram samhliða frumvarpi til breytinga á lögum um fjarskipti með hliðsjón af innleiðingu tilskipana er varða breytingar á fjarskiptaregluverki ESB. Einnig eru lagðar til breytingar á prósentustigi rekstrargjalds sem lagt er á fjarskiptafyrirtæki og póstfyrirtæki. (Haust)
Frumvarp til breytinga á lögum um loftferðir nr. 60/1998.
Með frumvarpinu eru lagðar til nokkrar breytingar s.s. að útgáfa reglugerða á sviði lofthæfis færist til ráðuneytisins, sett verði á laggirnar nefnd um flugvirkt (samhæfing opinberra aðila og annarra sem koma að afgreiðslu eða þjónustu við loftför , farþega, farangur og farm til þess að loftflutningar geti gengið snurðulaust fyrir sig) auk lagastoðar fyrir innleiðingu Evrópureglna um sektarheimildir EASA sem tímabært er að afla. (Haust)
Frumvarp til breytinga á lögum um skráð trúfélög nr. 108/1999, lögum um sóknargjald nr. 91/1987, og hjúskaparlögum, nr. 31/1993.
Með breytingum á ofangreindum frumvörpum er stefnt að því að lífsskoðunarfélög fái sömu heimild til skráningar og trúfélög hafa samkvæmt lögum, með þeim réttindum og skyldum sem skáningu fylgir. Jafnframt verður lagt til að afnumið verði það fyrirkomulag að barn skuli frá fæðingu talið heyra til sama skráða trúfélagi og móðir þess. (Haust)
Frumvarp til breytinga á lögum um greiðslu ríkissjóðs á bótum til þolenda afbrota, nr. 69/1995.
Með frumvarpinu er ætlunin að jafna stöðu þeirra einstaklinga sem fá dæmdar bætur vegna miska, en í dag er hámarksfjárhæð sem ríkið greiðir samkvæmt lögunum vegna miska 600 þúsund en er 2,5 m.kr. vegna líkamstjóns. (Haust)
Frumvarp til breytinga á lögum um framkvæmdarvald ríkisins í héraði, nr. 92/1989.
Með frumvarpinu verður lögð til breyting á stjórnsýsluumdæmum sýslumannsembætta í landinu. Markmið frumvarpsins er að fækka embættum og stækka þau og efla um leið stjórnsýslu ríkisins í héraði. (Haust)
Frumvarp til breytinga á lögum um Stjórnartíðindi og Lögbirtingablað nr. 15/2005.
Með frumvarpinu er verið að lögfesta ákvæði sem hingað til hafa verið í reglugerð um Stjórnarráð Íslands um að ráðherra gefi út safn gildandi laga ásamt gjaldtökuheimild. (Haust)
Frumvarp til laga um breytingar á lögum um fjarskiptasjóð
Með frumvarpinu er lagt til að framlengja rekstur sjóðsins þannig að nái fram yfir skuldbindingar samninga í hans nafni auk þess sem miðað er við að hann fái hlutverk við framkvæmd nýrrar fjarskiptaáætlunar. (Haust)
Frumvarp til umferðarlaga.
Um er að ræða frumvarp til nýrra umferðarlaga. Frumvarpið var áður flutt á 139. löggjafarþingi. (Haust)
Frumvarp til breytinga á áfengislögum nr. 75/1998.
Með frumvarpinu eru lagðar til breytingar á ákvæðum laganna er varða auglýsingar á áfengi. Frumvarpið var áður flutt á 139. löggjafarþingi. (Haust)
Frumvarp um Farsýsluna, stjórnsýslustofnun samgöngumála.
Með frumvarpi þessu er lagt til að sett verði á fót stofnun sem sinni stjórnsýslu og eftirliti á sviði samgöngumála. Myndun stofnunarinnar er hluti af heildarendurskoðun á skipulagi samgöngustofnana sem felur í sér að settar verði á fót tvær stofnanir, annars vegar Farsýslan og hins vegar Vegagerðin. Frumvarpið var áður flutt á 139. löggjafarþingi. (Haust)
Frumvarp um Vegagerðina, framkvæmdastofnun samgöngumála.
Með frumvarpi þessu er lagt til að sett verði á fót stofnun sem sinni framkvæmdum og viðhaldi samgöngumannvirkja ásamt því að fara með eignarhald og sinna rekstri þeirra. Myndun stofnunarinnar er hluti af heildarendurskoðun á skipulagi samgöngustofnana sem felur í sér að settar verði á fót tvær stofnanir, annars vegar Farsýslan og hins vegar Vegagerðin. Frumvarpið var áður flutt á 139. löggjafarþingi. (Haust)
Frumvarp til breytinga á lögum um skaðsemisábyrgð nr. 25/1991.
Með frumvarpinu eru lagðar til nauðsynlegar breytingar vegna athugasemda ESA um ábyrgðarreglur laganna. (Vor)
Frumvarp til breytinga á lögum um tekjustofna sveitarfélaga
Frumvarpið leggur til breytingar á lögum um tekjustofna sveitarfélaga m.a. með hliðsjón af tillögum tekjustofnanefndar. (Vor)
Frumvarp til vopnalaga.
Frumvarpið hefur að geyma ný vopnalög. (Vor)
Frumvarp til laga um rannsókn samgönguslysa.
Frumvarp þetta felur í sér sameiningu laga um rannsókn sjóslysa, laga um rannsókn flugslysa, og laga um rannsóknarnefnd umferðarslysa, í heildstæða löggjöf um slysarannsóknir í samgöngum. Frumvarpið var áður flutt á 139. löggjafarþingi. (Vor)
Frumvarp til laga um breyting á lögum um framsal sakamanna og aðra aðstoð í sakamálum nr. 13/1984.
Með frumvarpinu verða lagðar til breytingar vegna samnings Íslands við Evrópusambandið um framsal sakamanna þar sem gert er ráð fyrir að fyrirkomulag framsalsmála verði einfaldað. (Vor)
Frumvarp til breytinga á lögum um útlendinga
Frumvarpið er afrakstur af vinnu nefndar sem innanríkisráðherra skipaði í maí 2011. Meðal markmiða frumvarpsins er að einfalda stjórnsýslu og bæta réttarstöðu útlendinga og hælisleitenda við meðferð mála þeirra hjá stjórnvöldum. (Vor)
Frumvarp til breytinga á lögum um stöðu, stjórn og starfshætti þjóðkirkjunnar, nr. 78/1997
Með frumvarpinu eru lög um stöðu, stjórn og starfshætti þjóðkirkjunnar endurskoðuð í þeim tilgangi að stuðla að enn meira sjálfstæði þjóðkirkjunnar og færa fleiri ákvæði úr lögum í starfsreglur sem kirkjuþing setur. (Vor)
Frumvarp til laga um fullnustu refsinga.
Um er að ræða heildarendurskoðun á lögum um fullnustu refsinga. (Vor)
Frumvarp til laga um breytinga á lögum um siglingar nr. 34/1985
Þær breytingar sem hér eru lagðar til eru vegna ákvörðunar sameiginlegu EES-nefndarinnar um breytingu á XIII viðauka við EES-samninginn. Lagt er til að sett verði ákvæði um tryggingar skipaeigenda gegn sjóréttarkröfum þannig að skipseigendur séu tryggðir gegn tjóni sem skip þeirra valda þriðja aðila. (Vor)
Frumvarp til hafnalaga.
Með frumvarpinu verður gerð tillaga um heildarendurskoðun laganna með hliðsjón af tillögum nefndar sem hafði það verkefni að fara yfir framkvæmd laganna og fjármál hafna. (Vor)
Frumvarp til breytinga á lögum um kosningar til sveitarstjórna nr. 5/1998.
Með frumvarpinu er lagt til að tekið verði upp svokallað persónukjör. (Vor)
Frumvarp til breytinga á lögum um kosningar til Alþingis nr. 24/2000.
Með frumvarpinu er lagt til að tekið verði upp svokallað persónukjör. (Vor)
Frumvarp til laga um breyting á ýmsum lögum í tengslum við tilfærslu varnartengdra verkefna.
Um er að ræða breytingar á ýmsum lögum s.s. lögreglulögum, lögum um Landhelgisgæslu Íslands o.fl. vegna flutninga á varnartengdum verkefnum til Landhelgisgæslu og ríkislögreglustjóra. (Vor)
Frumvarp til breytinga á lögum um söfnunarkassa nr. 73/1994 og lögum um Happdrætti Háskóla Íslands nr. 13/1973
Um er að ræða heildarendurskoðun á ákvæðum laganna er varða happdrættisvélar. (Vor)
Frumvarp til laga um öryggi leikfanga.
Með frumvarpinu eru innleidd ákvæði tilskipunar nr. 2009/48/EB um öryggi leikfanga en ákvæði hennar tóku gildi á EES-svæðinu 20. janúar 2011. Ákvæði tilskipunarinnar taka til vöru sem er hönnuð og framleidd til notkunar fyrir leiki barna sem eru undir 14 ára að aldri. Öll leikföng eiga að bera CE- merki og vera framleidd þannig að þau ógni ekki lífi, heilsu og öryggi barna. (Vor)
Frumvarp til laga um gerð samninga um hlutdeild í afnotarétti orlofshúsnæðis.
Innleiða þarf ákvæði tilskipunar nr. 2008/122/EB um gerð samninga sem gerðir eru á skiptileigugrunni (e. timeshare). Tilskipunin fellir úr gildi eldri tilskipun um sama efni en sú tilskipun var innleidd í íslenskan rétt með lögum nr. 23/1997, um gerð samninga um hlutdeild í afnotarétti orlofshúsnæðis. Nýja tilskipunin felur í sér talsvert miklar breytingar þannig að stefnt er að því að lagt verði fram frumvarp til nýrra laga í stað þess að breyta eldri lögum. (Vor)
Frumvarp til laga um breytingu á lögum nr. 56/2007, um samvinnu stjórnvalda á Evrópska efnahagssvæðinu um neytendavernd
Reglugerð ráðsins nr. 2006/2004, um samvinnu neytendastjórnvalda var innleidd hér á landi með lögum nr. 56/2007, um samvinnu stjórnvalda á EES svæðinu um neytendavernd. Í viðauka við lögin er að finna lista yfir tilskipanir sem falla undir samstarfið en Evrópusambandið hefur bætt við fleiri tilskipunum sem falla eiga undir framangreint eftirlit stjórnvalda á EES svæðinu. Þannig hefur nú verið bætt á þennan lista tilskipun nr. 2009/136/EB sem breytir m.a. tilskipun 2002/22/EB um alþjónustu og réttindi notenda að því er varðar rafræn fjarskiptanet og þjónustu. Fleiri breytingar hafa verið gerðar á listanum og eru væntanlegar inn í EES samninginn, þannig hefur t.d. reglugerð ráðsins nr. 1177/2010/EB um réttindi sjó-og ferjufarþega verið bætt á þennan lista. (Vor)
Tillaga til þingsályktunar um 12 ára fjarskiptaáætlun.
Með þingsályktunartillögunni verða gerðar tillögur um áætlun um samskiptamálefni stjórnsýslunnar, sett markmið um öruggar fjarskiptatengingar fyrir landið allt, tengihraða, gæði í fjarskiptum og net- og upplýsingaöryggi. Einnig um stefnumörkun og skipulag póstþjónustu. (Haust)
Tillaga til þingsályktunar um samgönguáætlun.
Með þingsályktunartillögunni verður gerð tillaga um heildaráætlun um stefnu í samgönguframkvæmdum og aðgerðaráætlun þar sem markmið eru sett um greiðar, öruggar, hagkvæmar og umhverfisvænar samgöngur. (Haust)
Tillaga til þingsályktunar um 4ra ára fjarskiptaáætlun.
Með þingsályktunartillögunni verður gerð tillaga um verkefni í fjarskiptamálum næstu 4 árin. (Haust)

Mennta- og menningarmálaráðuneytið

Frumvarp til laga um menningarminjar.
Tilgangur frumvarpsins er að stuðla að verndun menningarminja og tryggja að íslenskum menningararfi verði skilað óspilltum til komandi kynslóða. Í frumvarpinu er lagt til að sett verði ný heildarlöggjöf um skipulag og verndun menningararfs. Frumvarpið var áður til meðferðar á 139. löggjafarþingi en náði ekki fram að ganga. (Haust)
Frumvarp til bókasafnalaga.
Tilgangur frumvarpsins er að efla starfsemi og samvinnu bókasafna í því augnamiði að tryggja varðveislu þess menningararfs sem þau hafa að geyma, og að bókasöfn geti sem best gegnt því hlutverki sínu að vera upplýsinga- og þekkingarveitur fyrir alla landsmenn sem halda uppi virkri og fjölþættri þjónustu á sviði vísinda og fræða, stjórnsýslu og atvinnulífs, lista- og menningarmála. Með frumvarpinu eru ákvæði gildandi laga endurskoðuð frá grunni í ljósi nýrra laga um Landsbókasafn Íslands-Háskólabókasafn. (Haust)
Frumvarp til laga um opinber skjalasöfn.
Markmið frumvarpsins er að tryggja vörslu og örugga meðferð opinberra skjala með réttindi borgaranna, hag stjórnsýslunnar og sögu íslensku þjóðarinnar að leiðarljósi. Meginmarkmið þeirrar endurskoðunar sem felst í frumvarpinu er að einfalda stjórnsýslu á málefnasviði Þjóðskjalasafnsins, skýra hana frekar með hliðsjón af fjölþættu hlutverki safnsins og stuðla að hagkvæmni og skilvirkni í rekstri þess. (Haust)
Frumvarp til laga um breytingar á bókmenntasjóði.
Tilgangur frumvarpsins er að þróa bókmenntasjóð yfir í miðstöð íslenskra bókmennta. Með frumvarpinu er fylgt eftir þátttöku Íslands sem heiðurgests á bókasýningunni í Frankfurt 2011. (Haust)
Frumvarp til myndlistarlaga.
Markmið frumvarpsins er að kveða á um skipan og fyrirkomulag myndlistarmálefna, að efla íslenska myndlist og búa henni hagfelld skilyrði. Við setningu safnalaga nr. 106/2001 breyttist hlutverk Listasafns Íslands á þann veg að það var gert að höfuðsafni á sviði myndlistar. Frumvarpinu er ætlað að fylgja eftir þeirri breytingu. (Haust)
Frumvarp til laga um breytingu á fjölmiðlalögum (reglur um takmörkun eignarhalds.)
Frumvarpinu er ætla að tryggja betur fjölræði og fjölbreytni í fjölmiðlum. Með frumvarpinu eru uppfyllt ákvæði til bráðabirgða í fjölmiðlalögum um að mennta- og menningarmálaráðherra skuli skipa nefnd til að gera tillögur í frumvarpsformi um viðeigandi takmarkanir á eignarhaldi á fjölmiðlum. (Haust)
Frumvarp til laga um breytingu á lögum um háskóla, nr. 63/2006.
Í frumvarpinu eru lagðar til breytingar á lögunum með tilliti til breytinga sem orðið hafa á háskólakerfinu frá setningu þeirra. Hugað verður sérstaklega að hlutverki háskóla og stjórnun, óháð rekstrarformi. Tilefni frumvarps þessa til breytinga á lögum nr. 63/2006 um háskóla eru m.a. ábendingar úr skýrslu rannsóknarnefndar Alþingis og skýrslu þingmannanefndar, sem skipuð var í framhaldi af fyrri skýrslunni. Í skýrslu rannsóknarnefndar Alþingis eru ábendingar til fræðasamfélagsins um hlutverk háskóla, ábyrgð starfsmanna og um almenna þátttöku í samfélagsumræðunni. (Haust)
Frumvarp til laga um breytingu á lögum um opinbera háskóla, nr. 85/2008.
Með frumvarpinu verða lagðar til breytingar á lögunum með tilliti til breytinga sem orðið hafa á háskólakerfinu frá setningu þeirra og til samræmis við frumvarp um breytingar á lögum um háskóla, nr. 63/2006. Í frumvarpinu er lagt til að allir opinberir háskólar heyri undir sömu lög í samræmi við stefnu mennta- og menningarmálaráðherra um opinbera háskóla. (Vor)
Frumvarp um lög um búnaðarfræðslu, nr. 57/2009, felld niður.
Í frumvarpinu er lagt til að starfsemi Hólaskóla - Háskólans á Hólum og Landbúnaðarháskóla Íslands verði felld undir lög um opinbera háskóla nr. 85/2008 og að lög um búnaðarfræðslu falli brott. Við samþykkt laga nr. 63/2006 og flutning á forræði landbúnaðarskólanna frá landbúnaðarráðuneyti til menntamálaráðuneytis var ráð fyrir því gert að skólarnir yrðu síðar meir felldir undir almenn lög um opinbera háskóla. (Vor)
Frumvarp til laga um vinnustaðanámssjóð.
Í frumvarpinu er lagt til að sett verði lög um stofnun vinnustaðanámssjóðs sem nýta má til að umbuna fjárhagslega fyrirtækjum og stofnunum sem sinna vinnustaðanámi starfsnámsnemenda á framhaldsskólastigi samkvæmt aðalnámskrá. Með frumvarpinu er fylgt eftir yfirlýsingu ríkisstjórnarinnar um að veita vinnustaðanámssjóði 150 m.kr. árlega frá árinu 2012 – 2014. (Vor)
Frumvarp til laga um breytingar á lögum um menntun og ráðningu kennara og skólastjórnenda við leikskóla, grunnskóla og framhaldsskóla, nr. 87/2008 (m.a. vegna leikskólakennara, framhaldsskólakennara og leyfisbréfa).
Tilgangurinn með frumvarpinu er endurskoðun laga nr. 87/2008 í ljósi reynslunnar. (Vor)
Frumvarp til laga um breytingu á íþróttalögum (lyfjaeftirlit)
Tilgangur frumvarpsins er að heimila ráðherra að gerast stofnaðili að sjálfseignarstofnun um lyfjaeftirlit. Með því er verið að efna skyldu íslenskra stjórnvalda og skýra ábyrgðarsvið ríkisins í lyfjaeftirliti í íþróttum til samræmis við alþjóðasamninga UNESCO og Evrópuráðsins um lyfjaeftirlit. (Vor)
Frumvarp til laga um endurskoðun laga um Ríkisútvarpið ohf, nr. 6/2007.
Tilgangur frumvarpsins er endurskoðun laga nr. 6/2007 í ljósi reynslunnar og til að verða við athugasemdum Eftirlitsstofnunar EFTA. Frumvarpið er m.a. byggt á vinnu nefndar sem gerði tillögur um úrbætur á fjárhags- og lagaumhverfi Ríkisútvarpsins ohf. Að auki er tilefni lagabreytinganna athugasemdir frá ríkisstyrkjadeild Eftirlitsstofnunar EFTA þar sem komist var að þeirri niðurstöðu að lög nr. 6/2007 samræmdust ekki ríkisstyrkjareglum EES-samningsins (Vor)
Frumvarp til sviðslistalaga
Markmið frumvarpsins er að efla íslenskar sviðslistir, kveða á um skipan og fyrirkomulag og búa þeim hagstæð skilyrði. Með sviðslistum er átt við leiklist, óperuflutning, listdans og skylda liststarfsemi sem heyrir ekki undir lög um aðrar listgreinar. Frumvarpið felur í sér endurskoðun á leiklistarlögum nr. 138/1998. Lagt er til að endurskoðuð lög nái til allra sviðslista og heiti því sviðslistalög.(Vor)
Frumvarp til laga um tónlistarfræðslu.
Frumvarpinu er ætlað að taka til starfrækslu tónlistarskóla. Með tónlistarskóla er í frumvarpinu átt við skóla sem rekinn er af sveitarfélagi eða sjálfstætt starfandi tónlistarskóla sem hlotið hefur viðurkenningu ráðuneytis. Með frumvarpinu er lagt til að sett verði ný heildarlög um skipan tónlistarfræðslu og um samskipti ríkis og sveitarfélaga í þeim málum. (Vor)
Frumvarp til laga um Lánasjóð íslenskra námsmanna
Með endurskoðun gildandi laga um Lánasjóð íslenskra námsmanna er stefnt að því að skýra tilgang og markmið námslánakerfisins og meta stöðu þess með hliðsjón af þróun námsframboðs og menntunar á háskólastigi. (Vor)
Tillaga til þingsályktunar um menningarstefnu.
Með þingsályktunartillögunni er lögð fram heildstæð menningarstefna sem myndar ramma um framtíðarsýn og áherslur ríkisins í menningarmálum. Menningarstefnan byggir m.a. á niðurstöðum menningarþings, Menningarlandið 2010 – mótun menningarstefnu sem haldin var í apríl það ár. (Haust)

Sjávarútvegs- og landbúnaðarráðuneytið

Frumvarp til laga um stjórn fiskveiða.
Frumvarpið byggist á að nytjastofnar á Íslandsmiðum séu auðlind í óskoraðri þjóðareign. Stjórnvöld fari með forsjá, vörslu og ráðstöfunarrétt auðlindarinnar. Veita má einstaklingum eða lögaðilum tímabundinn rétt til afnota eða hagnýtingar á auðlindinni gegn gjaldi. Óheimilt sé að selja auðlindina eða láta hana varanlega af hendi. Markmið frumvarpsins er þannig að stuðla að verndun og sjálfbærri og hagkvæmri nýtingu allra nytjastofna á Íslandsmiðum og tryggja með því trausta atvinnu og byggð í landinu. Úthlutun veiðiheimilda og gerð samninga um nýtingarleyfi á aflaheimildum myndar á gildistíma samninganna tímabundinn nýtingarrétt, með þeim takmörkunum sem leiðir af lögum og samningum. En hvorki beinan né óbeinan eignarrétt eða óafturkallanlegt forræði einstakra aðila yfir veiðiheimildum. Endurskoðað frumvarp frá 139. löggjafarþingi. (Haust)
Frumvarp til laga um breytingu á lögum um framleiðslu, verðlagningu og sölu á búvörum, nr. 99/1993.
Ýmis ákvæði er varða framleiðslustýringu og sölu búfjárafurða endurskoðuð. Frumvarpið á að tryggja betur samkeppni og öryggi svínakjötsframleiðenda. Unnið með hliðsjón af fyrirliggjandi skýrslu um eflingu svínaræktar. (Haust)
Frumvarp til laga um breyting á jarðalögum, nr. 81/2004 og ábúðarlögum, nr. 80/2004.
Vinnuhópur um endurskoðun jarða- og ábúðarlaga skilaði af sér bréfi til ráðherra, dags. 1. desember 2010, ásamt vinnuskjali sem innihélt drög að lagabreytingum. Frumvarpið hefur verið til kynningar í sumar og unnið frekar í ráðuneytinu. (Haust)
Frumvarp til laga um dýravelferð.
Meginmarkmið frumvarpsins er að stuðla að velferð dýra. Í frumvarpinu er lagt til að stjórnsýsla verði einfölduð og samræmd þannig að eitt ráðuneyti fari með forsjá löggjafar í stað tveggja nú og um leið ein stofnun, Matvælastofnun. Samkomulag er á milli sjávarútvegs- og landbúnaðarráðherra og umhverfisráðherra um að óska eftir því að málaflokkurinn færist í heild sinni til sjávarútvegs- og landbúnaðarráðherra. Frumvarpið hefur verið til almennrar kynningar í sumar. (Haust)
Frumvarp til laga um búfjárhald, nr. 103/2002.
Með frumvarpi til laga um dýravelferð er að stærstum hluta verið að sameina löggjöf á sviði dýraverndar og búfjárhalds sem nú fellur undir bæði lög nr. 15/1994 um dýravernd og lög nr. 103/2002 um búfjárhald o.fl. Nokkur ákvæði er ekki að finna í frumvarpinu sem áður voru í lögum nr. 103/2002 þar sem þeim hefur verið fundinn staður með einum eða öðrum hætti í frumvarpi til laga um dýravelferð. (Haust)
Frumvarp til laga um breytingu á lögum um matvæli, nr. 93/1995.
Í frumvarpinu er breytt gildissviði laganna til að skapa ákveðið svigrúm fyrir heimaframleiðslu og sölu beint til neytenda á tilgreindum forsendum. Í samræmi við kröfur ESA er kærufrestur vegna stjórnsýslukæra styttur úr þremur mánuðum í einn og sett inn skýr heimild fyrir Matvælastofnun til þess að skoða og fá aðgang að farmskjölum í kerfi tollayfirvalda. Þá eru þvingunarúrræði skýrð enn frekar, þ.e. vísað með skýrum hætti til þess að opinberir eftirlitsaðilar hafi heimild til að stöðva innflutning matvæla. (Haust)
Frumvarp til laga um breytingu á lögum um eftirlit með fóðri, áburði og sáðvöru, nr. 22/1994.
Endurskoðun á gildissviði, þannig að lögin nái án vafa til gæludýrafóðurs. Í samræmi við kröfur ESA er kærufrestur vegna stjórnsýslukæra styttur úr þremur mánuðum í einn mánuð og sett inn skýr heimild fyrir Matvælastofnun til þess að skoða og fá aðgang að farmskjölum í kerfi tollyfirvalda. (Haust)
Frumvarp til laga um breytingu á lögum um dýralækna og heilbrigðisþjónustu við dýr nr. 66/1998. Endurskoðun á ákvæðum um bakvaktir og vaktsvæði dýralæknaþjónustu. (Haust)
Frumvarp til laga til breytinga á lögum, um skiptaverðmæti og greiðslumiðlun innan sjávarútvegsins, nr. 24/1986.
Afnám greiðslumiðlunar og innheimta félagsgjalda. Í kjölfar dóms Hæstaréttar um lögmæti innheimtu félagsgjalda í sjávarútvegi er unnið að endurskoðun greiðslufyrirkomulags, t.d. vegna greiðslna til hagsmunaaðila og stéttarfélaga. Frumvarp endurflutt frá 139. löggjafarþingi. (Haust)
Frumvarp til laga um breytingu á lögum um búnaðargjald, nr. 84/1997.
Áformað er að leggja til breytingu á lögunum með hliðsjón af forsendum dóms Mannréttindadómstóls Evrópu um iðnaðarmálagjald. (Vor)
Tillaga til þingsályktunar um framlög til landshlutaverkefna í skógrækt.
Tillagan verður lögð fram í samræmi við 4. gr. laga um landshlutaverkefni í skógrækt, nr. 95/2006. Byggt á fyrirliggjandi skýrslu nefndar um landshlutaverkefni í skógrækt. (Vor)

Umhverfisráðuneytið

Frumvarp til laga um breytingu á lögum nr. 44/1999.
Með frumvarpinu verða lagðar til breytingar á 17. gr. og 37. gr. laga um náttúruvernd sem varða m.a. akstur utan vega og sérstaka vernd jarðmyndana og vistkerfa. (Haust)
Frumvarp til laga um umhverfisábyrgð.
Markmið frumvarpsins er að tryggja að sá sem ber ábyrgð á umhverfistjóni eða yfirvofandi hættu á umhverfistjóni komi í veg fyrir tjón eða bæti úr tjóni ef tjón hefur orðið og beri kostnað af ráðstöfunum sem af því leiðir. Með frumvarpinu er áformað að innleiða í íslensk lög tilskipun Evrópuþingsins og ráðsins nr. 2004/35/EB, um umhverfisábyrgð, í tengslum við varnir gegn umhverfistjóni og úrbætur. Frumvarpið var lagt fram á 139. löggjafarþingi en náði ekki fram að ganga og verður því lagt fram að nýju. (Haust)
Frumvarp til laga um breytingu á lögum um varnir gegn snjóðflóðum og skriðuföllum, nr. 49/1997.
Frumvarpinu er m.a. ætlað að heimila ofanflóðasjóði að taka þátt í kostnaði vegna vinnu við hættumat fyrir eldgos á Íslandi, en ríkisstjórn Íslands hefur nýlega samþykkt að hafin verði vinna við heildstætt hættumat fyrir eldgos á Íslandi. (Haust)
Frumvarp til laga um breytingu á lögum um hollustuhætti og mengunarvarnir, nr. 7/1998.
Með frumvarpinu er lagt til að gerðar verði breytingar á lögum um hollustuhætti og mengunarvarnir er varða m.a. eftirlit með starfsleyfisskyldri starfsemi og heimildir til að leggja á stjórnvaldssektir. (Haust)
Frumvarp til laga um breytingu á lögum um mat á umhverfisáhrifum nr. 106/2000.
Með frumvarpinu verða lagðar til breytingar á lögunum og viðaukum laganna í samræmi við ábendingar frá Eftirlitsstofnun EFTA. (Haust)
Frumvarp til laga um breytingu á lögum um varnir gegn mengun hafs og stranda, nr. 33/2004.
Frumvarpið mælir m.a. fyrir um viðbrögð við bráðamengun hafs og stranda, um viðbragðsaðila og lágmarkskröfur um mengunarviðbúnað í höfnum. (Haust)
Frumvarp til laga um breytingu á lögum nr. 65/2007 um losun gróðurhúsalofttegunda.
Með frumvarpinu verða lagðar til breytingar á lögunum m.a. til að setja lagastoð vegna reglugerða sem setja þarf á grundvelli laganna. (Haust)
Frumvarp til laga um efni og efnavöru.
Með frumvarpinu er lögð til heildarendurskoðun á lögum um eiturefni og hættuleg efni. (Vor)
Frumvarp til laga um breytingu á lögum um erfðabreyttar lífverur, nr. 18/1996.
Með frumvarpinu er áformað að innleiða ákvæði Cartagena-bókunar við samning um líffræðilega fjölbreytni frá árinu 2000. (Vor)
Frumvarp til laga um gróðurhúsalofttegundir.
Með frumvarpinu verður lögð til ný heildarendurskoðun á lögum um losun gróðurhúsalofttegunda. Frumvarpið er til innleiðingar reglna ETS (viðskiptakerfis ESB með losunarheimildir gróðurhúsalofttegunda). (Vor)
Frumvarp til laga um breytingu á lögum um meðhöndlun úrgangs, nr. 55/2003.
Frumvarpið er til innleiðingar á rammatilskipun um úrgang, 2008/98/EB. (Vor)

Utanríkisráðuneytið

Tillaga til þingsályktunar um fullgildingu samnings Evrópuráðsins um varnir gegn kynferðislegri misneytingu og kynferðislegri misnotkun á börnum. (Haust)
Tillaga til þingsályktunar um samþykki rammasamnings milli ríkisstjórnar Íslands og framkvæmdastjórnar Evrópusambandsins um reglur um samstarf er varðar fjárhagsaðstoð ESB við Ísland innan ramma stuðningsaðgerða sjóðs ESB sem fjármagnar aðstoð við umsóknarríki. (Haust)
Tillaga til þingsályktunar um fullgildingu samnings Matvæla- og landbúnaðarstofnunar S.þ. um að stuðla að fylgni fiskiskipa á úthafinu við alþjóðlegar verndunar- og stjórnunarráðstafanir. (Haust)
Tillaga til þingsályktunar um fullgildingu fríverslunarsamnings milli ríkja Fríverslunarsamtaka Evrópu og Lýðveldisins Kólumbíu og landbúnaðarsamnings milli Íslands og Lýðveldisins Kólumbíu. (Vor)
Tillaga til þingsályktunar um fullgildingu fríverslunarsamnings milli ríkja Fríverslunarsamtaka Evrópu og aðildarríkja Samstarfsráðs Arabaríkjanna við Persaflóa og landbúnaðarsamnings milli Íslands og aðildarríkja Samstarfsráðs Arabaríkjanna við Persaflóa. (Vor)
Tillaga til þingsályktunar um staðfestingu samkomulags um breytingar á samningi um framtíðarsamvinnu ríkja varðandi fiskveiðar á Norðaustur-Atlantshafi (NEAFC-samningnum). (Vor)
Tillaga til þingsályktunar um fullgildingu Cartagena-bókunar við samning um líffræðilega fjölbreytni, um líföryggi. (Vor)
Tillaga til þingsályktunar um fullgildingu samnings um aðgerðir hafnríkja gegn ólöglegum fiskveiðum. (Vor)
Tillaga til þingsályktunar um fullgildingu fríverslunarsamnings milli ríkja Fríverslunarsamtaka Evrópu og Hong Kong, landbúnaðarsamnings milli Íslands og Hong Kong og vinnuréttarsamnings milli EFTA-ríkjanna og Hong Kong. (Vor)
Tillaga til þingsályktunar um fullgildingu viðbótarbókunar við samning Evrópuráðsins um tölvubrot. (Vor)
Tillaga til þingsályktunar um fullgildingu viðauka við samning Evrópuráðsins um refsilöggjöf gegn spillingu. (Vor)
Gert er ráð fyrir að lagðar verði fram á annan tug þingsályktunartillagna um staðfestingu ákvarðana sameiginlegu EES-nefndarinnar sem fela í sér breytingar á viðaukum og bókunum við EES-samninginn.
Gert er ráð fyrir að lagðar verði fram tillögur til þingsályktunar um staðfestingu væntanlegra fiskveiðisamninga vegna ársins 2012, m.a. samninga um veiðar úr norsk-íslenska síldarstofninum og samnings milli Íslands og Færeyja um fiskveiðar innan íslenskrar og færeyskrar lögsögu.

Velferðarráðuneytið

Frumvarp til laga um breytingu á lögum um sjúkratryggingar nr. 112/2008.
Frestun gildistöku ákvæða um að Sjúkratryggingar annist samningsgerð við opinberar heilbrigðisstofnanir og þá sem reka hjúkrunarheimili og framlenging bráðabirgðaákvæðis um heimild ráðherra til að ákveða daggjöld vegna heilbrigðisþjónustu sem veitt er í hjúkrunarrýmum sjúkrahúsa og hjúkrunarheimila. Á síðasta þingi var gildistöku ákvæða um að Sjúkratryggingar annist samningsgerð við opinberar heilbrigðisstofnanir og þá sem reka hjúkrunarheimili frestað til 1. janúar 2012. Fyrrgreind ákvæði fela í sér grundvallarbreytingu á ákvörðun fjárveitinga til opinberra heilbrigðisstofnana. Slík breyting krefst mikils undirbúnings og því óhjákvæmilegt að fresta gildistöku fyrrgreindra ákvæða. (Haust)
Frumvarp til laga um breytingu á lögum um sjúkratryggingar nr. 112/2008
Frumvarpið fjallar um greiðsluþátttöku í lyfjakostnaði. Frumvarpið var áður flutt á 139. löggjafarþingi. (Haust)
Frumvarp til laga um heilbrigðisstarfsmenn
Frumvarp til nýrra heildarlaga. Frumvarpið var áður flutt á 139. löggjafarþingi. (Haust)
Frumvarp til laga um vísindarannsóknir á heilbrigðissviði.
Um er að ræða frumvarp til heildarlaga um vísindarannsóknir á heilbrigðissviði með það að markmiði að stuðla að vönduðum vísindarannsóknum á heilbrigðissviði og tryggja hagsmuni þátttakenda. Gildandi reglur um vísindarannsóknir á heilbrigðissviði eru flóknar og úreltar og byggja á dreifðum ákvæðum í lögum, reglugerðum, starfsreglum og leiðbeiningum. Nauðsynlegt þykir að einfalda umsóknarferli vísindarannsókna á heilbrigðissviði og skýra einstaka þætti löggjafarinnar með ítarlegri hætti en hefur verið gert. Setning laga um vísindarannsóknir á heilbrigðissviði er jafnframt hluti af undirbúningi fullgildingar á viðbótunarbókun með sáttmála Evrópuráðsins um mannréttindi og líflæknisfræði (Oviedo sáttmálinn). (Haust)
Frumvarp til laga um breytingu á lögum um lækningatæki nr. 16/2001
Kveðið verði á um að innflytjendur lækningatækja og þeir sem bera ábyrgð á markaðssetningu lækningatækja skrái vöruna hjá Lyfjastofnun. Jafnframt verði kveðið á um heimild til að setja reglugerð um gjaldtöku fyrir skráninguna. Markmið breytinganna er að auka öryggi við notkun lækningatækja. (Haust)
Frumvarp til laga um breytingu á lyfjalögum nr. 93/1994
Lagt verður til að hjúkrunarfræðingum og ljósmæðrum, sem starfa á heilbrigðisstofnunum, verði veitt heimild til að ávísa hormónatengdum getnaðarvörnum. Þá verði hámark dagsekta sem Lyfjastofnun getur lagt á hækkað úr kr. 50.000 kr. á sólarhring í kr. 100.000. Lyfjalögin eru komin til ára sinna og nauðsynlegt er að fram fari heildarendurskoðun á þeim. Þar sem gera má ráð fyrir að slík endurskoðun taki talsverðan tíma þykir nauðsynlegt að leggja til að fyrrgreindar breytingar verði gerðar á lögunum á þessu þingi. (Haust)
Frumvarp til laga um breytingu á lögum um réttindagæslu fyrir fatlað fólk nr. 88/2011
Lagt er til að bætt verði í lögin nýjum kafla um aðgerðir til að takmarka beitingu nauðungar í vinnu með fötluðu fólki. Frumvarpið tengist fyrirhugaðri fullgildingu sáttmála Sameinuðu þjóðanna um réttindi fólks með fötlun. Fyrirmæli um framlagningu frumvarps þessa efnis er að finna í ákvæði III til bráðabirgða í lögum nr. 88/2011. (Haust)
Frumvarp til laga um breytingu á lögum nr. 45/2007, um réttindi og skyldur erlendra fyrirtækja sem senda starfsmenn tímabundið til Íslands og starfskjör starfsmanna þeirra.
Frumvarp þetta er lagt fram til að framfylgja dómi EFTA-dómstólsins í máli E-12/10 Eftirlitsstofnun EFTA gegn Íslandi vegna reglna um réttindi og skyldur erlendra fyrirtækja sem senda starfsmenn tímabundið til Íslands og um starfskjör þeirra. Dómstóllinn komst að þeirri niðurstöðu að ákvæði laganna um rétt til launa í veikinda- og slysatilvikum og slysatryggingar vegna andláts, varanlegs líkamstjóns og tímabundins missis starfsorku væru ósamrýmanleg samningnum um Evrópska efnahagssvæðið. (Haust)
Frumvarp til laga um breytingu á lögum nr. 139/2005, um starfsmannaleigur.
Frumvarp þetta felur í sér innleiðingu á tilskipun 2008/104/EB um starfsmannaleigur en samkvæmt tilskipuninni ber að innleiða hana fyrir 5. desember 2011. Markmið tilskipunarinnar er að tryggja starfsmönnum starfsmannaleigna starfsskilyrði sem samræmist þeim sem almennt tíðkast, svo sem varðandi aðbúnað, hollustuhætti og öryggi á vinnustöðum, takmarkanir á vinnutíma, hvíldartíma og orlof. (Haust)
Frumvarp til laga um breytingu á lögum nr. 88/2003, um Ábyrgðarsjóð launa.
Frumvarp þetta er lagt fram í samræmi við yfirlýsingu ríkisstjórnarinnar í tengslum við gerð kjarasamninga á almennum vinnumarkaði frá 5. maí 2011 þar sem gert er ráð fyrir að gjald í Ábyrgðasjóð launa hækki um 0,05% af tryggingagjaldsstofni frá ársbyrjun 2012. Gjaldið verður því 0,3%. Enn fremur mun frumvarp þetta fela í sér ákvæði sem ætlað er að koma til móts við athugasemdir Eftirlitsstofnunar EFTA vegna innleiðingar á tilskipun 2008/94/EB um vernd starfsmanna við gjaldþrot vinnuveitenda þeirra (áður tilskipun 80/987/EBE með síðari breytingum, um sama efni). (Haust)
Frumvarp til laga um breytingu á lögum nr. 61/1999, um evrópsk samstarfsráð í fyrirtækjum.
Frumvarp þetta er lagt fram til innleiðingar á tilskipun 2009/38/EB um evrópsk samstarfsráð í fyrirtækjum, en þar er tilskipun 94/45/EBE um evrópsk samstarfsráð í fyrirtækjum endurútgefin ásamt öllum þeim breytingum á efni hennar sem hafa komið til síðar. (Haust)
Frumvarp til laga um breytingu á lögum nr. 44/1998, um húsnæðismál.
Frumvarp þetta er lagt fram í því skyni að koma til móts við þær athugasemdir sem Eftirlitsstofnun EFTA hefur gert við þær reglur sem gilda um Íbúðalánasjóð. Velferðarráðherra hefur skipað nefnd sem fjallar meðal annars um hvernig bregðast skuli við framangreindum athugasemdum og er nefndinni ætlað að skila ráðherra tillögum í september 2011. Enn fremur mun frumvarp þetta fela í sér breyttar reglur um fjárhagslegt eftirlit með Íbúðalánasjóði. Þá verður lagt til með frumvarpi þessu að fella brott heimildir Íbúðalánasjóðs að kaupa fasteignaveðlán af fjármálastofnunum en þessar heimildir voru hluti þeirra aðgerða sem Alþingi samþykkti í kjölfar efnahagsþrenginganna í október 2008. (Haust)
Frumvarp til laga um breytingu á lögum nr. 100/2010, um umboðsmann skuldara.
Fjármálafyrirtæki standa straum af kostnaði við rekstur umboðsmanns skuldara með greiðslu sérstaks gjalds. Við framkvæmd álagningar gjaldsins hafa komið fram ákveðin vandkvæði sem ástæða þykir til að leggja til að verði færð til betri vegar. (Haust)
Frumvarp til laga um breytingu á lögum nr. 101/2010, um greiðsluaðlögun einstaklinga
Ákveðin reynsla er komin á framkvæmd laga um greiðsluaðlögun einstaklinga en við framkvæmd laganna hafa komið upp ákveðin vandkvæði sem lagt er til að verði sniðin af með frumvarpi þessu. Slíkar breytingar eru taldar mikilvægar í því skyni að tryggja að framkvæmd laganna geti gengið vel fyrir sig. (Haust)
Frumvarp til laga um breytingu á lögum um málefni aldraðra nr. 125/1999 og lögum um heilbrigðisþjónustu nr. 40/2007.
Lagt er til að vistunarmatsnefndir vegna hjúkrunarrýma og dvalarrýma aldraðra verði sameinaðar. Samkvæmt gildandi lögum er sérstök nefnd um vistunarmat hjúkrunarrýma og önnur nefnd um vistunarmat dvalarrýma í hverju heilbrigðisumdæmi. Vistunarmatsnefndir eru því samtals 14. Verkefni þessara nefnda falla vel saman og breytingin felur í sér einföldun og hagræðingu fyrir stjórnvöld og notendur. (Haust)
Frumvarp til laga um aðlögun innflytjenda.
Í frumvarpinu verður kveðið á um atriði sem varða aðlögun innflytjenda og önnur löggjöf fjallar ekki um. Þar verði m.a. ákvæði um upplýsingasöfnun og miðlun upplýsinga til innflytjenda, hlutverk og starfsemi innflytjendráðs, þróunarsjóð innflytjendamála og Fjölmenningarsetur. Kveðið er á um samningu frumvarps um aðlögun innflytjenda í þingsályktun um framkvæmdaáætlun í málefnum innflytjenda, sem samþykkt var á Alþingi 29. maí 2008. (Haust)
Frumvarp til laga um breytingu á lögum um almannatryggingar nr. 100/2007
Frumvarp þetta felur í sér endurskoðun almannatryggingalaga. Í samræmi við stefnuyfirlýsingu ríkisstjórnarinnar er gert ráð fyrir að kerfið verði einfaldað með fækkun bótaflokka og einfaldari reglum um útreikning bóta þannig að gott aðgengi sé tryggt sem og jöfnuð meðal þeirra sem þurfa að nýta sér kerfið sér til framfærslu. Einnig verður í frumvarpinu gert ráð fyrir breyttri framsetningu og ákvæðum sem snúa að réttindum og skyldum borgaranna ásamt nauðsynlegum breytingum á lögum um almannatryggingar o.fl. lögum vegna innleiðingar á Evrópureglugerð 883/2004/EB um almannatryggingar. (Vor)
Frumvarp til laga um breytingu á húsaleigulögum nr. 36/1994.
Samráðshópur um húsnæðisstefnu lagði til í skýrslu sinni í apríl 2011 að gildandi húsaleigulög yrðu endurskoðuð. Í skýrslunni komu fram ákveðnar athugasemdir við gildandi lög sem þarfnast skoðunar sem og að mikilvægt sé að húsaleigulög séu í samræmi við gildandi húsnæðisstefnu. Meðal annars kom fram að skoða þyrfti sérstaklega réttindi leigjenda gagnvart stærri leigusölum, þ.e. félögum, uppsagnir húsaleigusamninga, tryggingafé og þinglýsingar á húsaleigusamningum. (Vor)
Frumvarp til laga um breytingu á lögum nr. 6/2002 um tóbaksvarnir
Lagt verður til að Áfengis- og tóbaksverslun ríkisins verði heimilt að hafna tóbaksvörum sem sérstaklega er beint að ungu fólki. Þá verður lagt til að notkun nef- og munntóbaks í framhaldsskólum verði bönnuð. Sett verði ítarlegri ákvæði um eftirlit og viðurlög, m.a. heimild til tímabundinnar sviptingar leyfis, skráningarskyldu leyfishafa, eftirlit með leyfishöfum, heimild til að nota tálbeitu og beitingu sekta. Í rammasamningi Alþjóðaheilbrigðismálastofnunarinnar FCTC sem Ísland fullgilti árið 2004 kemur m.a. fram að móta skuli eða hrinda í framkvæmd skilvirkum áætlunum sem miða að því að tóbaksnotkun sé hætt á stöðum á borð við menntastofnanir, heilsugæslustöðvar, vinnustaði og þar sem íþróttir eru stundaðar. Samkvæmt tóbaksvarnalögum eru tóbaksreykingar óheimilar í skólum og í húsakynnum félags-, íþrótta- og tómstundastarfs barna og unglinga. Önnur neysla tóbaks svo sem nef- og munntóbaks, er jafnframt bönnuð á sömu svæðum að undanskildum framhaldsskólum. Í ljósi niðurstaðna kannana sem benda til mikillar aukningar á munntóbaksnotkun, einkum hjá ungum karlmönnum er því lagt til að notkun nef- munntóbaks verði einnig bönnuð í framhaldsskólum. Ennfremur er vísað til þess að í þingsályktun um aðgerðaráætlun til fjögurra ára til að styrkja stöðu barna og ungmenna, sem samþykkt var á Alþingi 2007, er kveðið á um almennar forvarnaraðgerðir.(Vor)
Frumvarp til laga um bann við mismunuInn
leiðing tilskipunar 2000/78/EB um bann við mismunun á vinnumarkaði, tilskipunar 2000/43/RB um bann við mismunun á grundvelli kynþáttar og etnis og tilskipunar um jafna meðferð kvenna og karla við afhendingu vöru og þjónustu. (Vor)
Frumvarp til laga um réttindi transfólks.
Nauðsynlegar breytingar á lögum til að tryggja réttindi og skýra réttarstöðu transfólks. Tilefni lagasetningar er álit setts umboðsmanns Alþingis í máli nr. 4919/2007, tillaga til þingsályktunar um réttarbætur fyrir transfólk sem lögð var fram á 138. löggjafarþingi, sbr. þskj. 187 – 168. mál, en hlaut ekki afgreiðslu þingsins og þróun málefna transfólks hjá Evrópuráðinu og Mannréttindadómstól Evrópu. (Vor)
Tillaga til þingsályktunar um heilbrigðisáætlun til ársins 2020
Undanfarin misseri hefur verið unnið að gerð heilbrigðisáætlunar til ársins 2020 og mun sú áætlun leysa af hólmi fyrri heilbrigðisáætlun sem náði til ársloka 2010 og var samþykkt sem þingsályktun frá Alþingi árið 2001. Í nýju heilbrigðisáætluninni er leitast við að móta skýra framtíðarsýn í heilbrigðismálum þjóðarinnar næsta áratuginn. Áætlunin inniheldur yfirlit yfir aðgerðir sem ætlað er að bæta almennt heilsufar þjóðarinnar og tryggja að íbúar landsins búi við sem jafnasta lífskosti í heilsufarslegum efnum. Við mótun heilbrigðisáætlunarinnar hefur verið haft náið samráð við fjölmarga hagsmunaaðila og notendur þjónustunnar. Jafnframt er undirstrikað mikilvægi þess að heilbrigðisáætlunin verði lifandi tæki í höndum stjórnenda, fagfólks og annarra starfsmanna heilbrigðisþjónustunnar. (Vor)
Tillaga til þingsályktunar um framkvæmdaáætlun í málefnum fatlaðra.
Samkvæmt ákvæði til bráðabirgða í lögum um málefni fatlaðs fólks nr. 59/1992 skal ráðherra eigi síðar en 1. október 2011 leggja fram á Alþingi þingsályktunartillögu um framkvæmdaáætlun í málefnum fatlaðs fólks. Í áætluninni skal setja fram stefnu í málefnum fatlaðs fólks og tímasettar aðgerðir vegna lögfestingar samnings Sameinuðu þjóðanna um réttindi fatlaðs fólks. (Haust)

Efnisorð

Ríkisstjórn